Minisitiri w’Intebe wa Australia, Scott Morrison yamaganye ibikorwa by’ihohotera rishingiye ku gitsina rimaze iminsi rivugwa mu nzego za Leta zitandukanye ndetse yihanganisha Higgins wahoze akora muri biro bye ariko nyuma akaza guhishura ko yahafatiwe ku ngufu.
Muri Mutarama umwaka ushize wa 2021 nibwo uyu mudamu wasabwe imbabazi Higgins yeruye avuga kuri aka kaga yahuye nako ubwo yakoraga mu biro bya Minisitiri w’Intebe, ubwo muri 2019 yafashwe ku ngufu na mugenzi we w’umugabo bakoranaga.
Yavuze ko na nyuma yo kubwira abamukuriye ibyamubayeho ntacyo bamufashije ahubwo yamaganywe.
Ibyatangajwe n’uyu mugore byatumye muri iki gihugu havuka imyigaragambyo yo kwamagana ihohotera rishingiye ku gitsina rikorerwa abagore bakora mu nzego zitandukanye
Ubwo yari mu kiganiro n’abagize Inteko Ishinga Amategeko ya Australia, Minisitiri w’Intebe wa Australia, Scott Morrison yatangaje ko yamaganye ihohoterwa rishingiye ku gitsina rikorerwa abagore muri iki gihugu.
Yagize ati “Nsabye imbabazi Higgins kubera ibintu birenze ukwemera byabereye aha, nanone ndasabira imbabazi ibirenze ibyo ndetse n’abaje mbere ya Higgins bakihanganira ibikorwa nk’ibyo.”
Nyuma y’uko Higgins atangaza ihohoterwa yakorewe, hahise hatangizwa ubushakashatsi mu nzego za Leta, hagamijwe kugenzura niba koko habaho ihohoterwa rishingiye ku gitsinda. Kugeza ubu hamaze kugaragara ko mu biro bya “Commonwealth” umugore umwe muri batatu bahakora aba yarafashwe ku ngufu.
Ange KAYITESI
